Adolygiad o'r Cynllun Ffioedd Teulu Graddedig
Canllaw cryno i'r newidiadau a ddaeth i rym ar 28 Chwefror 2005
Daeth yr adolygiad o'r Cynllun Ffioedd Teulu Graddedig i ben ym mis Gorffennaf 2004. Cytunwyd ar newidiadau i'r strwythur a'r cyfraddau. Nod y rhan fwyaf o'r newidiadau yw gwneud i'r taliadau adlewyrchu'r cymhlethdodau penodol a all godi mewn cyfraith teulu er mwyn ymateb i'r pryderon bod y cynllun, yn gyffredinol, yn rhy 'wastad' a bod ganddo gyfraddau is o lawer mewn meysydd fel achosion llareiddiad ategol. Ar ben hynny, bydd newid y ffordd y cyflwynir hawliadau'n gwella'r rhyngweithiad rhwng twrneiod a chwnsleriaid ac yn cyflymu'r broses.
Mae'r nodyn byr hwn yn amlinellu sut y caiff cwnsleriaid eu talu am waith o fewn y cynllun diwygiedig. Dim ond tystysgrifau newydd a gyhoeddir neu ddiwygiadau a wneir i ychwanegu achos newydd at dystysgrif gyfredol ar neu ar ôl 28 Chwefror 2005 sy'n berthnasol. Mae'r Comisiwn Gwasanaethau Cyfreithiol wedi cynhyrchu pecyn gwybodaeth fanylach sydd ar gael i gwnsleriaid. Mae hwn yn cynnwys diwygiadau i arweiniad y Comisiwn Gwasanaethau Cyfreithiol a newidiadau i'r cyfraddau.
Newid y ffordd y caiff cwnsleriaid eu talu
- Caiff Taliadau Mater Arbennig eu talu ar bob uned gwrandawiad a phob gwrandawiad swyddogaeth F2 ac F3. Diwygiwyd y Taliadau Mater Arbennig er mwyn iddynt fod yn benodol i bob un o'r pedwar categori yn y cynllun; bydd Taliadau Mater Arbennig gwahanol ar gael ar gyfer pob un o'r pedwar categori gwaith.
- Yng Nghategori 1, achosion gwaharddeb teulu, ailddiffinir swyddogaeth F2 a diwygir swyddogaeth F3 i'w ymestyn i wrandawiadau traddodi, er mwyn adlewyrchu eu difrifoldeb a'u pwysigrwydd.
- Caiff taliad ategol ychwanegol yng Nghategori 4, achosion llareiddiad ategol yn bennaf, ei greu ar gyfer achosion gorfodi a gwaharddebau a wrthwynebir er mwyn adlewyrchu eu cymhlethdod a'r baich gwaith trwm.
- Caiff ffioedd sylfaenol mewn perthynas â swyddogaethau F1 (Cyngor - gwaith ysgrifenedig) ac F4 (Cynadleddau) eu talu hyd at ddwywaith mewn categori pan fydd y twrnai sy'n cyfarwyddo'n cadarnhau bod hynny'n angenrheidiol.
- Bydd y Taliad Mater Arbennig "Arbenigwr" mewn achosion categori 4 yn daladwy pan geir mwy nag un arbenigwr (wedi'i alw neu ei ddarllen). Ar gyfer achosion llareiddiad ategol y mae hyn yn bennaf ac mae'n adlewyrchu'r ffaith mai pur anaml y defnyddir mwy nag un arbenigwr.
Taliadau Mater Arbennig newydd a gyflwynir
Ychwanegir tri Taliad Mater Arbennig newydd ar gyfer cymhlethdodau gwahanol a gyfyd. Mae'r Taliadau Mater Arbennig newydd hyn yn berthnasol i'r holl gleientiaid a gynrychiolir gan gwnsler pan fo'n briodol ac a ddilysir gan y Barnwr neu'r Ynad yn unol â'r Gorchymyn Cyllido.
- Y Taliad Mater Arbennig "Rhieni/honiadau yn erbyn eraill". Caiff y Taliad Mater Arbennig hwn ei dalu mewn achosion Deddf Plant cyfraith gyhoeddus pan fydd cwnsler yn cynrychioli rhiant plentyn neu berson yr honnir ei fod wedi achosi niwed sylweddol i blentyn. Mae'r taliad mater arbennig hwn yn awtomatig ar gyfer y rheini sy'n cynrychioli'r rhieni ond yn amodol ar y prawf sylwedd a pherthnasedd ar gyfer y rheini a fydd yn cynrychioli eraill.
- Y Taliad Mater Arbennig "Anhawster wrth roi cyfarwyddiadau/deall cyngor". Mae hwn ar gael mewn achosion Deddf Plant cyfraith gyhoeddus a Deddf Plant cyfraith breifat i adlewyrchu'r gwaith ychwanegol sydd ei angen i gynrychioli cleientiaid sy'n cael anawsterau wrth roi cyfarwyddiadau neu ddeall cyngor, naill ai oherwydd eu bod yn dioddef anhwylder meddwl sydd wedi'i ddiagnosio neu fod ganddynt nam sylweddol o ran deallusrwydd neu weithredu cymdeithasol. Mae hwn yn daliad mater arbennig awtomatig ond mae'n amodol ar gyflwyno adroddiad priodol i'r Barnwr neu'r Ynad wrth ddilysu.
- Y Taliad Mater Arbennig "Dadansoddi cyfrifon busnes". Mae hwn yn cynnwys cyfrifon sy'n ymwneud ag ymddiriedolaethau a buddsoddiadau. Mae'r mater arbennig yn adlewyrchu'r gofal a'r gwaith paratoi ychwanegol sydd ei angen mewn achosion pan fydd angen dadansoddi cyfrifon busnes y cleient fel rhan o'u cynrychiolaeth, ac fe'i telir yn bennaf mewn achosion llareiddiad ategol.
- Ar ben hynny, bydd arweiniad y Comisiwn Gwasanaethau Cyfreithiol yn egluro bod y Taliad Mater Arbennig "Asedau" yn cynnwys gwaith sy'n ymwneud â rhannu neu glustnodi pensiynau.
I gael diffiniadau llawn edrychwch ar Orchymyn y Gwasanaeth Cyfreithiol Cymunedol (Cyllido) (Cwnsleriaid mewn Achosion Teulu) (Diwygio) 2005 (O.S. 2005/184)
Newidiadau eraill i'r cynllun
- Caiff y terfyn amser i gwnsler gyflwyno hawliad am daliad ei gwtogi o dri mis i ddau fis, yn dilyn casgliad prif wrandawiad, neu ryddhau neu ddirymu tystysgrif.
- Cyflwynir newidiadau i ddefnyddio'r Egwyddor Uchafswm Ffi yn y Llys Achosion Teulu fel a ganlyn:
- mewn achosion pan roddwyd awdurdod ymlaen llaw ar gyfer defnyddio cwnsler neu pan gyfiawnhawyd yr awdurdod drwy asesiad, caiff ffioedd y cwnsler eu tau yn y swm ffi teulu graddedig; ac
- ym mhob achos arall cyfrifir ffioedd y cwnsler ar gyfraddau awr priodol y twrnai dan Reoliadau Cymorth Cyfreithiol mewn Achosion Teulu (Tâl) 1991.
- Caiff y tablau cyfraddau yn Atodlen 1 y Gorchymyn Cyllido eu diwygio hefyd.
Mae arweiniad a gwybodaeth gyffredinol am y cynllun, a rhagor o fanylion am y newidiadau a amlinellir uchod ar gael ar wefan y Comisiwn Gwasanaethau Cyfreithiol yn www.legalservices.gov.uk/.
Os hoffech dderbyn copi o'r pecyn gwybodaeth llawn neu os oes gennych unrhyw ymholiadau penodol am y newidiadau i'r Cynllun Ffioedd Teulu Graddedig, cysylltwch â Ruth Symons dros yr e-bost.
Os hoffech edrych ar ryngrwyd Gweinyddiaeth Cyfiawnder edrychwch ar http://www.justice.gov.uk/
Cangen Cymorth Cyfreithiol Sifil
Adran Gwasanaethau Cyfreithiol Cyhoeddus 1
Gweinyddiaeth Cyfiawnder
Chwefror 2005